أيام ابتدائى ....
أيام ابراهيم كعبورة ..وعلاء زلطة...وسحر السرسوعة
طبعا أنا ذاكرتى مش ذاكرة حوت عشان أقول انى فاكر أيام ابتدائى بالتفصيل ..ده مستحيل ..على الأقل بالنسبة لى أنا ..يمكن يكون فى ناس عندها القدرة دى لكن أنا للأسف ..لا..
لكن تقدر تقول ان من سنة رابعة ابتدائى وخامسة فاكر مواقف مش قليلة ومش كتيرة فى نفس الوقت ..أما بخصوص بقه سنة أولى وتانية وتالتة فالذاكرة تكاد تكون اتمسحت باستثناء موقفين ..تلاتة.. ومش اقدر احدد كانوا فى سنة كام ..بس اللى أنا متأكد منه انهم كانوا بعيد عن سنة رابعة وخامسة وهاوضح كمان شوية أنا متأكد ليه .
الموقف الاول ......."أبلة العربى ...بعيد عن السامعين"
كنا فى الفصل وكانت مدرسة العربى عصبية جدا ..وكنت انا قاعد فى الصف اللى فى الوسط، أول تختة ...يعنى خبط لزق فى وش الأبلة ..فى الصف اللى على يمينى بنات ..فى التختة الأولى كانت قاعدة بنت كنت باحس انها قاعدة معانا ومش قاعدة معانا ..مرة ألاقيها مركزة فى السقف ..مرة مركزة فى زرار فى مريلتها ..مرة مركزة فى جزمة حد..وكانت بتخاف من الصوت العالى جدا ..اللى عرفنى بقه حكاية خوفها من الأصوات العالية ..لما مدرسة العربى العصبية اياها صرخت فى وش بنت عشان نسيت الكراسة ..لقيت البنت اللى على يمينى بتاعة الزراير والجزم دى مفزوعة وبتصرخ بصوت مسرسع وفجأة ..ايه ياجدعان ؟...البت أغمى عليها ..الفصل اتقلب والأبلة وشها قلب الوان الطيف والمدير والناظر وحدوتة ...وعرفنا من يومها ان سحر دى اللى اغمى عليها بتخاف من الصوت العالى او أى توتر فى الفصل
...أرجع بقه للموقف اللى يخصنى ..
وده كان بعد فترة من موضوع حادثة سحر وكانت مدرسة العربى كل لما تيجى تضربنا لأى سبب أو تحس انها هتتعصب خلاص ..تروح مزحلقة سحر ...
-روحى ياسحر هاتى طباشير من مكتب الناظر
- روحى ياسحر اغسلى وشك شكلك تعبانة
وبعد ماتطلع سحر ..تدينا يامعلم ..
وللحديث بقية
ليست هناك تعليقات:
إرسال تعليق